D Gschicht vo üsem churze Weg,
Isch wiä dä Name zimli schreeg.
Schöö schreeg isch zwor nöd ersch vor Stunde
aber vor mene Johr erfunde
worde - sither laufts am Meter
Marlis, Willi, Paul und Peter
hend vor mene Johr a somä n Obed
gseit du chom, mer probed
ä mol im Monet sötts üs jugge
en glatte Obed so! als Gugge

Uf diä Idee jetz mol es Lob
praktisch isch den halt diä Prob
meischtens grad en Uftritt gsi
s’gitt es Muschter - losed hi
Und meischtens probets nöd elei
- im Früelig im zweitusigzwei
gits grad e Pröbli uf’s Exempel
Schöö schreeg - das isch de nöi’i Stempel
Im Pelagiberg im Chrüz
git’s es Muschter vo de Fasnachtsbütz

De Peter goht -- doch s’isch nöd ohni
Nochfolger Ueli und au d’Conny
mached’s guet und bringet Luune
Das isch Musig - chasch no stuune

Ä Proob in Paul sim Garte
tuet au e bitzeli uus-arte
de Nochbuur rüeft - chönd zonis – d’Musig
do - tönt gär nöd grusig
Es git ä Fescht das de Balke chracht
Mer gönd erscht hei noch Mitternacht
So hemmer’s Lebä n üs verschönt
hend immer g’spilt- los wie da tönt

Im Sommer hemmer denkt mer gönd
will mer niemer störe wönd
an See i d’Wiese eis go spiele
Vom Cämpingplatz tüens döreschile
do rüefed paar: chönd doch er Trudler
ehr Splitter vo de Sittertaler Hochzigsduddler
Da git e Welle voll Raz Baz
es hüpft de ganzi Cämpingplatz
und diä Fusion - seit s’Chind zum Opa
isch di bescht in ganz Europa!!!!
För Gasche mosch nöd zitterle
nur ganz e chli halb-literle

Möbel Messmer …Starag und Familie Tobler
bruuched üs als Stimmigshobler
Ei Anekdote gits - schöö schreeg
im grosse Ganze sind mer zweg
doch 1x hemmer en Kollaps
do nützt kei Suppe und kein Schnaps
I Vollmontur isch üsi Küür
gad nebet em Schminefüür
Mer hend söss meischtens kei Sträss
doch döt sind mer wiä Hafechäs
em Hitzschlag nöch - vom Stengeli kippt
I erschter Hilf hem mehr es Bierli kippt
Und d’Moral für alli Beize:
wenn Gugger chönd - tönd nöd z’fescht heize
mer mached das - s nennt eu vom Ses(s)el
mer spieletd jetz: De roschtig Esel

Dass ehr eu ä Bild chönd mache
näbscht Johresbricht und andre Sache
wiä sone n echti HV goht
Dä Präsi Paul – me weiss - das goht
D’Marlis isch dä Aktuar
diä schriibt – das isch jo allne klar
D’Conny – söss kei Husiereri
isch aber voll Kassiereri
Dä musikalisch oberheiter
Willi isch dä Stimmigsleiter
beziehigswiis de Barometer
fürs Repertoir am Kilometer
Dä Ueli… isch bi jedem Wetter
dä oberscht Musigstellvertreter
Öppis hani no vergesse
- bevor mer amel chunt zum Esse -
s hätt den zwor kei Publikum, kei Wähler
dä Wirt das isch dä Stimmäzähler
ehr gsend – s’lot sich nöd viel verlute
öber üseri Statute
Gad will mehr nöd wiä jede
tüend schnore plodere und rede
Meh lached nu – ganz brav und gruusig
meischtens mached m’hr eifach Musig